荒山怨笛（上海话）
难扳有闲，蟠到西山。日里，满目红叶，半山秋阳，到了夜里，就完全勿一样了。
吃仔夜饭，搀牢灯灯个手，搭老杜交代了两句，笃悠悠荡到后山，去寻一块青砖。
搿块青砖是日里发觉个。一块相当平常个青砖。但是看牢伊，就觉着特别想搭伊亲热，我刚刚想坐下去，灯灯拦牢我，跪下去，拿半只面孔贴上去，闭起眼睛。我退后几步，勿声勿响，用镜头对牢伊，揿了快门。
有一片枫叶运道特别好，承接了太阳光个安抚，变得透明，风过处，飘起来了。
“喂喂，起来起来，覅贪适意，现在个风毒来死个……”我一头讲一头去扳灯灯个肩胛。
“嘘~~覅吵，里向有声音！”灯灯拨我硬劲弄起来，勿大开心，我勿相信伊个闲话，当是作小姑娘在瞎三话四。“真个呀，是笛子~~”
我勿睬伊，“灯灯，此地蛮好，阿拉坐脱一歇好伐？搿块青砖坐起来肯定适意个。”
“覅~~”灯灯勿许，“阿拉还是夜到再来，安静，可以更加清爽个听到青砖里个笛子声。”
我拍拍灯灯半爿面孔，刚刚拨石头冰过，瀴笃笃，摸上去特别适意。
“好好好好好……小戆大……”
今朝勿是月半就是十六，月亮大得勿大真实，淡黄个光泻下来，树叶子雪一样，白，亮。
青砖托牢屁股，服帖，有眼寒丝丝。
除脱我搭灯灯，呒没别人。一男一女，寂静如斯，正好，好做眼两家头做个事体。
突然，灯灯犟了犟，捉牢我臂把，手冰冰瀴。
“嘘~~侬听呀~~青砖里向~~”灯灯用气声对牢我耳朵讲。
搿种气流拿我个耳朵吹得又湿又痒，寒毛根根竖起，随即——
山光树影，笛声入画，呜呜咽咽，若断若续。曲子相当熟悉，一时想勿起来啥曲名。 心里一阵泛潮，甜酸苦辣，辨勿清啥味道。过脱一歇，慢慢叫适应了。
“戆大，明明有人吹笛子，搭搿块青砖搭界？”灯灯勿响。等脱一歇，讲：“我懂了，搿块砖头天天夜里听，所以伊里里外外浸透了笛声。侬猜，啥人吹个？”
闲话没讲光，笛子又吹起来了，外加起风，声音游游荡荡……月亮偏斜，笛声中断，不像是自然个收束，我头皮为之一麻。
灯灯捉牢我的手，紧张起来：“勿好，阿是吹笛子个人闯祸了？”
吹笛子个人？哪能了？吹了一半，冷陌生头停下来，哪能桩事体？
身处荒山，勿敢多响，回别墅问老杜去。
老杜笑得相当勿自然，“我来讲桩事体~~”
“陈立三，就是电视浪一直出来的陈立三。伊前头个老婆，李家阿三，民乐团吹笛子个，刚刚过门辰光，两家头来得要好。过脱一呛，阿三借到舞剧《丝路花语》剧组，吹笛子，勿晓得哪能会得交了墓库运了，看相了女主角英娘了！赛过五雷轰顶！阿三发觉自家之前像没做过人一样，自家原来是应该搭女人要好个。眼眼叫碰着眼眼叫，英娘也像吃错药一样，两家头算是搭牢了，分也分勿开。阿三开诚布公，搭陈立三明讲，并提出离婚。陈立三开明来死，对阿三也是一帖药，只要阿三开心，女人欢喜女人也呒啥好想勿通个，爽爽气气答应了。阿三搭英娘过了一段ooxx个开心日脚，两家头借了搿幢别墅住了半年把。有一日英娘在山上碰着一个游客，觉着自家还是更加适合男人，留了一张纸条，下山了。”
“阿三万念俱灰，坐在青砖浪，一夜天一夜天个吹笛子。”
“陈立三晓得了，上山来寻阿三，只求完璧归赵了。”
“阿三勿肯，又怕陈立三烦，横勿好竖勿好。”
“搿日夜里，勿是月半就是十六，阿三坐了青砖浪吹笛子。”
“陈立三睏了别墅里听。”
“一曲未了，笛声断脱了……”
“陈立三奔过去，只看见一枝竹笛，横在青砖上，阿三，勿知去向……”
老杜讲好了，我问伊：“别墅是啥人个？”
“侬认得个，侬勿是通过房产中介，自家问伊借个？”
“侬是啥人？”
“我本生是殡仪馆工作人员~~ ”
“主人寻着我，出大价钿请我管别墅。”
“搿能个别墅还借出来害人？”
“有啥办法？主人勿敢住，又勿想伊空关。”
“你啥体勿告我讲清爽？”
“垃㑚之前，也有人来住过，有个人听得到笛声，有个人听勿到笛声，我好讲啥？每个人机缘勿同，火旺勿同，碰得着总归碰得着，碰勿着总归碰勿着？”
我无言以对。
下山。
三个钟头个下山路。
我搭灯灯走了一日天。
【註】墓庫運：噩運。運氣不好，凡事不順利。相術名詞，指地支辰、戌、丑、末。
读：唐位位
排版：BINGO